काठमाडौं, मंसिर ११ । नेकपा एमालेले प्रतिनिधिसभाको प्रत्यक्षतर्फ १६५ मध्ये १५६ स्थानको नतिजा आउँदा ४१ स्थानमा जीत निकालेको छ । अध्यक्ष केपी शर्मा ओलीलगायत आठ जना पदाधिकारी ४१ जना नेताहरुले सत्ता गठबन्धनका उम्मेदवारलाई पराजीत गर्दै निर्वाचनमा बिजयी हुनुभएको हो ।

एमाले पदाधिकारीहरुमध्ये अध्यक्ष ओली, उपाध्यक्षद्वय बिष्णुप्रसद पौडेल, सुवासचन्द्र नेम्माङ, उपमहासचिव पृथ्वी सुब्बा गुरुङ, सचिवहरु छविलाल बिश्वकर्मा, गोकण बिष्ट, योगेश भट्टराई र टोपबहादुर रायमाझीले जीत निकाल्नु भएको छ भने उपाध्यक्ष सुरेन्द्र पाण्डे, महासचिव शंकर पोखरेल, उपमहासचिव प्रदीप ज्ञवाली र सचिव लेखराज भट्ट पराजीत हुनुभएको छ ।

यस्तै सचिवद्वय रघुबीर महासेठ र पदमाकुमारी अर्यालको परिणाम आउन बाँकी रहेको छ । धनुषा ४ मा एमाले सचिव महासेठ गठबन्धनका उम्मेदवारभन्दा पछि पर्नुभएको छ । उहाँको मतगणना जारी रहेको छ भने अर्की सचिव पदमाको स्यांजा क्षेत्र नम्बर २ मा बुथ कब्जा भएकोले पुनः मतदानको मागसहित मतगणना रोकिएको छ ।