महाभारा । झापाको गौरीगञ्ज गाउँपालिका वडा नं १ स्थित रहेको जनकल्याण आधारभूत विद्यालयका विद्यार्थीहरूलाई जाडोमा स्वीटर वितरण गरिएको छ । बुधवार विद्यालयका कक्षा १ देखि कक्षा ७ सम्मका विद्यार्थीहरूलाई स्वीटर वितरण गरिएको हो ।

विद्यालयका पूर्व विद्यार्थी प्रेस चौतारी नेपाल जिल्ला कमिटी झापाका उपाध्यक्ष तथा इजलासका सम्पादक प्रदीप परियारको पहलमा १ सय २० जना विद्यार्थीहरूलाई स्वीटर वितरण गरिएको विद्यालयका प्रधानाध्यापक भीम बहादुर कार्कीले बताउनुभयो । विद्यालयमै पुगेर पूर्व विद्यार्थी परियारले स्वीटर वितरण गर्नुभएको हो । विद्यालयका जग्गादाता, विद्यालय व्यवस्थापन समिति, जनप्रतिनिधि, अभिभावकहरू समेतको उपस्थितिमा स्वीटर वितरण गरिएको प्रधानाध्यापक कार्कीले जानकारी दिनुभयो ।

पूर्व विद्यार्थी परियारले बिर्तामोडका सामाजिक एवम् व्यवसायी व्यक्तित्वहरूको सहयोगमा स्वीटर वितरण गरेका हुन् । परियारका अनुसार बिर्तामोडका व्यवसायी निर्मल भट्टराई, सुवास भट्टराई, सञ्जीव घिमिरे, दिवाकरलाल चौधरी, पिन्टु शाह, नवीन ढुङ्गानाको सहयोगमा १२० जना विद्यार्थीलाई स्वीटर वितरण गरिएको हो ।

स्वीटर वितरण गर्दै परियारले आफूले अध्ययन गरेको विद्यालयका भाइवहिनीहरुलाई स्वीटर वितरण गर्न पाउँदा खुसी व्यक्त गरेका छन् । विद्यार्थी र विद्यालयका लागि सधैँ सहयोग गर्ने परियारले बताउनुभयो । उनले शिक्षक, अभिभावकलाई विद्यालय उत्कृष्ट बनाउन आग्रह समेत गरेका छन् ।